Nadoman Sunda

Gusti urang sarerea

Kangjeng Nabi anu mulya

Muhammad jenenganana

Arab Qurais nya bangsana

Ramana sayyid Abdullah

Ibuna Siti Aminah

dibabarkeunna di Mekkah

Wengi Senen taun Gajah

Rabi'ul Awal sasihna

tanggal kadua belasna

april bulan masehina

tanggal kadua puluhna

Ari bilangan taunna

lima ratus cariosna

tujuh puluh panambihna

sareng sahiji punjulna

Siti Aminah misaur

waktos babarna kacatur

ningal cahya mani ngempur

dibumina hurung mancur

Babar taya kokotoran

orok lir kenging nyepitan

soca lir kenging nyipatan

sarta harum seuseungitan

Keur opat taun yuswana

diberesihan manahna

Nabi dibeulah dadana

Malaikat nu meulahna

Jibril kadua rencangna

Mikail jenengan nana

Ngeusikeun kana manahna

Elmu Hikmat sapinuhna

Tuluy dada Kangjeng Nabi

gancang dirapetkeun deui

sarta teu ngaraos nyeri

di lap ku khotaman nabi

Nuju tanggal tujuh likur

Bulan Rajab nu kacatur

nurut kaol anu mashur

Kangjeng Nabi teh disaur

Dipapag ku Malaikat

nyandak Buroq nu kasebat

Leumpangna teh cara kilat

tungganganeun Nabi angkat

Ti Mekkah k Baitul Maqdis

teu nganggo lami antawis

ku jalma henteu katawis

Kersana Gusti nu wacis

Ti Baitul Maqdis terasna

naek na tangga kancana

Mi'raj tea kasebatna

ka langit Nabi sumpingna

Tujuh langit sadayana

jeung Arasy nu pangluhurna

disumpingan sadayana

katut surga narakana

Kangjen Nabi ditimbalan

ku Gusti ni sifat Rahman

anjeuna kudu netepan

salat muji ka pangeran

Kabeh jalma anu iman

sami pada kawajiban

salat nu lima giliran

henteu meunang dikurangan

Salat eta minangkana

dina agama tihangna

jalma nu luput salatna

nyata rubuh agamana